სამართალი

საკონსტიტუციო სასამართლოში სახალხო დამცველის სარჩელის განხილვა იწყება

• By admin
• 15-05-2025

2025 წლის 15 მაისს, 14:00 საათზე, საქართველოს საკონსტიტუციო სასამართლოში გაიმართება არსებითი განხილვის სხდომა საქმეზე „საქართველოს სახალხო დამცველი საქართველოს პარლამენტის წინააღმდეგ“ (კონსტიტუციური სარჩელი №1802).

„განსახილველ საქმეზე გასაჩივრებული ნორმების თანახმად, 12 კვირაზე მეტი ხანგრძლივობის ორსულობის ხელოვნურად შეწყვეტა დასაშვებია მხოლოდ იმ სამედიცინო და სოციალური ჩვენებების მიხედვით, რომელთა ჩამონათვალი დგინდება მინისტრის ბრძანებით.

მოსარჩელე მხარის განმარტებით, 12 კვირაზე მეტი ხანგრძლივობის ორსულობის ხელოვნურად შეწყვეტა გაუპატიურების მსხვერპლ ქალებს მხოლოდ იმ შემთხვევაში შეუძლიათ, თუ აღნიშნული ფაქტი დასტურდება სასამართლოს მიერ საქმეზე გამოტანილი გამამტყუნებელი განაჩენით. პრაქტიკაში, სისხლის სამართლის საქმის გამოძიებისა და საერთო სასამართლოებში განხილვის ვადები, როგორც წესი, აღემატება ორსულობის მთლიან პერიოდსაც კი, რაც ფაქტობრივად, შეუძლებელს ხდის გაუპატიურების მსხვერპლი ქალების მიერ, საგამონაკლისო წესის მიხედვით, დადგენილ ვადაში ორსულობის ხელოვნურად შეწყვეტას.

მოსარჩელე მხარე მიიჩნევს, რომ პირის უფლება, თავად მიიღოს საკუთარ ჯანმრთელობასთან, მათ შორის, რეპროდუქციულ ჯანმრთელობასთან, სხეულთან, ფიზიკურ და ფსიქიკურ განვითარებასთან ან/და შვილის ყოლის დროსთან დაკავშირებული გადაწყვეტილებები დაცულია საქართველოს კონსტიტუციის მე-12 მუხლით (საკუთარი პიროვნების თავისუფალი განვითარების უფლება) და მე-15 მუხლის პირველი პუნქტით (პირადი და ოჯახური ცხოვრების ხელშეუხებლობის უფლება). მოსარჩელის პოზიციით, სადავო ნორმები ზღუდავს სქესობრივი ძალადობის შედეგად დაორსულებული ქალის მიერ აბორტის გაკეთების შესაძლებლობას, რის გამოც, ეწინააღმდეგება კონსტიტუციის ზემოაღნიშნულ ნორმებს.

საქმეს არსებითად განიხილავს საქართველოს საკონსტიტუციო სასამართლოს მეორე კოლეგია.

დავის საგანი: „ჯანმრთელობის დაცვის შესახებ“ საქართველოს კანონის 139-ე მუხლის მე-2 პუნქტის „ა“ ქვეპუნქტისა და 140-ე მუხლის მე-2 პუნქტის კონსტიტუციურობა საქართველოს კონსტიტუციის მე-12 მუხლთან და მე-15 მუხლის პირველ პუნქტთან მიმართებით“, - აღნიშნულია საკონსტიტუციო სასამართლოს მიერ გავრცელებულ ინფორმაციაში.