მთავარი თემა

დღეიდან ხმაური და ღამის საათებში პიროტექნიკის გამოყენება დასჯადი ხდება

დღეიდან ძალაში შევიდა ”ადმინისტრაციულ სამართალდარღვევათა კოდექსში” განხორციელებული ცვლილებები, რომლითაც აკუსტიკური ხმაურის დასაშვები ნორმების გადამეტება და ასევე, ღამის საათებში პიროტექნიკის გამოყენება ადმინისტრაციული წესით დასჯადი გახდა.

კერძოდ, დღისა და ღამის საათებში საცხოვრებელ სახლში, კერძო საკუთრებაში არსებული უძრავი ქონების ან საზოგადოებრივი-საჯარო დაწესებულების შენობაში აკუსტიკური ხმაურის დასაშვები ნორმების გადამეტება გამოიწვევს ფიზიკური ან იურიდიული პირის გაფრთხილებას.

აღნიშნული ქმედების ერთი წლის განმავლობაში გამეორება გამოიწვევს ფიზიკური პირის დაჯარიმებას 150 ლარის ოდენობით, ხოლო იურიდიული პირის – 500 ლარის ოდენობით. 

ამასთან, ამ სამართალდარღვევისათვის ადმინისტრაციულ სახდელდადებული პირის მიერ იმავე ქმედების ჩადენა ან ამ ქმედების ჩადენის შემდეგ, იმავე ქმედების ადმინისტრაციულ სახდელდადებული პირის სტატუსის გაუქმებამდე ჩადენა - გამოიწვევს ფიზიკური პირის დაჯარიმებას 300 ლარის ოდენობით, ხოლო იურიდიული პირისა – 1000 ლარის ოდენობით.

”ადმინისტრაციულ სამართალდარღვევათა კოდექსის” მიხედვით, დღის საათებში იგულისხმება დრო 08:00 საათიდან 23:00 საათამდე, ხოლო ღამის საათებში – დრო 23:00 საათიდან 08:00 საათამდე.

თავის მხრივ, საქართველოს მთავრობამ ”საცხოვრებელი სახლების და საზოგადოებრივი/საჯარო დაწესებულებების შენობების სათავსებში და ტერიტორიებზე აკუსტიკური ხმაურის ნორმების შესახებ” ტექნიკური რეგლამენტი მიიღო, რომლითაც აკუსტიკური ხმაური, მათ შორის, პიროტექნიკური ნაკეთობის მიერ გამოცემული ხმაური დასაშვები ნორმები დადგინდა. 

აქვე უნდა აღინიშნოს, რომ ხმაურთან დაკავშირებული აკრძალვა არ ვრცელდება საავიაციო, სარკინიგზო (მათ შორის, მეტროპოლიტენის), საზღვაო და საავტომობილო ინფრასტრუქტურაზე, შეკრება-მანიფესტაციებთან დაკავშირებულ ღონისძიებებზე, დღის საათებში მიმდინარე სამშენებლო და სარემონტო სამუშაოებსა და ადგილობრივი თვითმმართველობის ორგანოსთან შეთანხმებულ დასვენების, კულტურისა და სპორტის საჯარო ღონისძიებებზე.

რაც შეეხება პიროტექნიკური ნაკეთობის გამოყენებასთან დაკავშირებულ აკრძალვას, ”ადმინისტრაციულ სამართალდარღვევათა კოდექსის” მიხედვით, ღამის საათებში პიროტექნიკური ნაკეთობის გამოყენება გამოიწვევს ფიზიკური პირის დაჯარიმებას 150 ლარის ოდენობით, ხოლო იურიდიული პირისა – 500 ლარის ოდენობით.

აღნიშნული ქმედების ერთი წლის განმავლობაში მეორედ და მის შემდეგ ყოველი მომდევნო ჩადენა გამოიწვევს ფიზიკური პირის დაჯარიმებას 300 ლარის ოდენობით, ხოლო იურიდიული პირისა – 1000 ლარის ოდენობით.

პიროტექნიკურ ნაკეთობაში იგულისხმება პიროტექნიკური შემადგენლობის ნაკეთობა, რომლის თავისუფალი გაყიდვა ნებადართულია და რომელიც განკუთვნილია სპეციალური სამუშაოების მიმდინარეობის, აგრეთვე მასობრივი, სადღესასწაულო (საზეიმო) ღონისძიებების ჩატარების დროს სინათლის, ხმის, კვამლის და კომბინირებული (მათ შორის, სასცენო) ეფექტების შესაქმნელად.

პიროტექნიკის გამოყენებაზე ადმინისტრაციული პასუხისმგებლობა არ გავრცელება ახალი წლის სადღესასწაულო დღეებზე (31 დეკემბრის 21:00 საათიდან 2 იანვრის 23:00 საათამდე და 13 იანვრის 21:00 საათიდან 14 იანვრის 23:00 საათამდე), საქართველოს სახელმწიფოებრივი დამოუკიდებლობის აღდგენის აქტის მიღების დღესა (9 აპრილი) და საქართველოს დამოუკიდებლობის დღეზე (26 მაისი).