მსოფლიო

იქნებ ვინმეს ეცნოს ეს ისტორია და საკუთარი თავი ამოიცნოს. ტაქსი დედაჩემმა გააჩერა თემქაზე, მესამე მიკრო რაიონის მეხუთე კვარტალის 24-ე კორპუსთან - სტიქაროსანის ოჯახი ეძებს ტაქსის მძღოლს, რომელთანაც შეხება ჰქონდათ

„ჩემი ჯანმრთელობის მდგომარეობას სტაბილურია“- ამის შესახებ კორონავირუსით ინფიცირებულმა სტიქაროსანმა ტელეკომპანია „პალიტრანიუსის“ გადაცემაში „360 გრადუსში“ ისაუბრა. სტიქაროსანმა დაინფიცირების ისტორია დეტალურად გაიხსენა.

„ინფიცირებულები ვართ ოჯახის ოთხი წევრი. ბაბუა, რომელიც 82 წლის გახლავთ, ამჟამად რეანიმაციაშია მოთავსებული. დედა და დეიდა ჩემს პალატაში არიან. ყველას ორმხრივი პნევმონია გვაქვს.

თავდაპირველად ბაბუა დაინფიცირდა. სუნთქვის გართულება დაეწყო. დავრეკეთ სასწრაფოში, მაგრამ მოსვლაზე უარი თქვეს, ასე გვითხრეს უბნის ექიმს მიმართეთო.

როცა უბნის ექიმს მივმართეთ, მან ასეთი პასუხი გაგვცა, მისამართებზე არ დავდივარ ტელეფონით მითხარით ჩივილებიო.

ბაბუას მდგომარეობა სულ უფრო მძიმდებოდა. მერე დედამ გადაწყვიტა ასაკოვანი მამა სახლთან მდებარე კლინიკაში ტაქსით მიეყვანა.

დაახლოებით 14:00 საათი იქნებოდა როცა დედაჩემი გავიდა ქუჩაში, გააჩერა გამვლელი ტაქსი და სახლთან მოიყვანა.

როცა ბაბუა მანქანაში ჩავსვით, ამ დროს მოვიდა სასწრაფო, რომლის პერსონალს პირბადეც კი არ ეკეთა. მოხუცი ტაქსიდან სასწრაფოს მანქანაში გადავსვით და თბილისის ზღვის ჰოსპიტალში გადაიყვანეს.

ისეთი ანერვიულებულები ვიყავით მე და დედაჩემი, რომ სამწუხაროდ იმ ტაქსის ნომერიც კი ვერ დავიმახსოვრეთ. შესაბამისად არ მომხდარა აღნიშნული ტაქსის იდენტიფიცირება.

იქნებ ვინმეს ეცნოს ეს ისტორია და საკუთარი თავი ამოიცნოს. ტაქსი დედაჩემმა გააჩერა თემქაზე, მესამე მიკრო რაიონის მეხუთე კვარტალის 24-ე კორპუსთან.“- განაცხადა სტიქაროსანმა.

საიდან დაინფიცირდა მისი ოჯახი ამაზე ზუსტი პასუხი არ აქვს, თუმცა ერთ-ერთ ვერსიად სტიქაროსანი ლიფტს ასახელებს.

„სავარაუდოდ ბაბუას დაინფიცირება მოხდა ლიფტიდან, რადგან ის ხშირად გადიოდა მაღაზიაში პროდუქტების საყიდლად. ამის თქმის საფუძველს კი ის მაძლევს, რომ ჩვენს სადარბაზოში მესამე სართულზე კორონავირუსით ინფიცირებულები გვყავდნენ, საუბარია რომანოვების კლასტერზე.

მათგან საავადმყოფოში გადაიყვანეს ცოლ-ქმარი და მათი შვილების ძიძა, რომელიც სხვა კორპუსში ცხოვრობს.

როცა ეს ამბავი დედაჩემმა შეიტყო, ის კორპუსის თავმჯდომარე გახლავთ, დარეკა მერიაში სადარბაზოს დეზინფექცია ჩაატარეთო. მერიაში უპასუხეს, რომ არ ჰქონდათ სადეზინფექციო ხსნარი.

ბაბუას პირველი სიმპტომი საერთო სისუტე იყო. ამბობდა ალბათ გაციებული ვარო. ორი დღის შემდეგ სუნთქვის უკმარისობა დაეწყო.

საგულისხმოა ერთი გარემოება, როცა ბაბუა თბილისის ზღვის ჰოსპიტალში მიიყვანეს, მას თან დედა ახლდა, რომელიც ექიმებმა საავადმყოფოში არ დატოვეს.

იმ დღესვე დაბრუნდა სახლში. მეორე დღეს, როცა ბაბუას მდგომარეობა მოვიკითხეთ, გვითხრეს კორონავირუსი დადასტურდაო.“- ამბობს ინფიცირებული.

მან იმ სავარაუდო კონტაქტებზეც ისაუბრა, რომელიც მას და მის ოჯახის წევრებს ჰქონდათ.

რაც შეეხება ჩემს ეკლესიაში სიარულს, როცა ჩვენს სადარბაზოში რომანოვების კლასტერი გამოვლინდა, ჩემმა მამაომ მითხრა, თავის დაზღვევის მიზნით ტაძარში აღარ იაროო.

ჩემი სიჯიუტიდან გამომდინარე ეკლესიაში მაინც მივედი, მაგრამ ღვთისმსახურებაში მონაწილეობა არ მიმიღია. კონტაქტი არავისთან მქონია გარდა მამაოსი. არ მაქვს ინფორმაცია ამჟამად მამაო იმყოფება თუ არა თვითიზოლაციაში.“