საზოგადოება

დიდი სკანდალი ქართულ ინტერნეტ სივრცეში და ფარული მოლაპარაკება, რომლის დეტალები itv.ge-მ გაარკვია

itv.ge-ს ექსკლუზივი: აზერტელეკომის სახელით, კავკასუს ონლაინთან და მის მფლობელ ხვიჩა მაქაცარიასთან მოლაპარაკებებს, ოპტიკურ ბოჭკოვანი კაბელის გაყიდვის შესახებ, ეკონომისტი გიგა ბედინეიშვილი აწარმოებს.

მართალია, გიგა ბედინეიშვილმა ჩვენთან საუბარში განაცხადა რომ კომერციულ საკითხებზე საჯაროდ არ საუბრობს, თუმცა, სამაგიეროდ, სომხეთის მთავრობასა და მედიაში უკვე ღიად ალაპარაკდნენ იმ რისკებზე, რომლებიც შესაძლოა, კავკასუს ონლაინის მიერ ოპტიკურ ბოჭკოვანი კაბელის აზერტელეკომისათვის მიყიდვამ გამოიწვიოს.

ინტერნეტ ტელევიზია itv.ge-მ ქართულ მედიაში პირველმა გაავრცელა ინფორმაცია იმასთან დაკავშირებით, რომ კავკასუს ონლაინის მფლობელი, ხვიჩა მაქაცარია (მან მოლაპარაკებების დაწყებამდე ცოტა ხნით ადრე მეწილეებს წილი დაათმობინა), იმ 1200 კილომეტრიანი ოპტიკურ ბოჭკოვანი კაბელის გაყიდვაზე ფიქრობს, რომლითაც საქართველო, სომხეთი, აზერბაინაჯისა და ირანის ნაწილი ინტერნეტით მარაგდება.

სომხეთში შიშობენ რომ თუ აზერტელეკომმა ხელში ჩაიგდო კავკასუს ონლაინის 1200 კილომეტრიანი ოპტიკურ ბოჭკოვანი კაბელი, აზერბაიჯანს შეეძლება გააკონტროლოს როგორც ქართული, ისე სომხური ინტერნეტ-სივრცე და ის საკომუნიკაციო არხები, რომელიც ეროვნულ უსაფრთხოებას უკავშირდება.

საქართველოში კი, ამ თემას ჯერჯერობით ტაბუ ადევს და კავკასუს ონლაინის მენეჯმენტი, რომლის უკან რეალურად ბიძინა ივანიშვილი დგას, დუმს...

მიუხედავად იმისა, რომ მეზობელ სომხეთში პრესაც აჭრელებულია და საერთაშორისო ფორუმებზეც აქტიურად განიხილავენ „საფრთხეს, რომელიც შესაძლოა საქართველო-აზერბაიჯანის ფარული გარიგებით წარმოიქმნას“.

itv.ge დეტალების გარკვევის მიზნით, ეკონომისტ გიგა ბედინეიშვილს დაუკავშირდა, რომელიც ჩვენი ინფრორმაციით, აზერტელეკომის სახელით ეკონტაქტება კავკასუს ონლაინის მფლობელსა და დირექტორს...

ბედინეიშვილი კომერციულ საკითხებზე საჯაროდ არ საუბრობს, თუმცა, უპასუხოდ ტოვებს კითხვას: როდის შეხვდით ბოლოს კავკასუს ონლაინის მფლობელს, ხვიჩა მაქაცარიას ან დირექტორს, გიორგი შანიძეს?

- ბატონო გიგა, ჩვენთვის ცნობილი გახდა რომ თქვენ აზერტელეკომის სახელით მოლაპარაკებებს აწარმოებთ კავკასუს ონლაინთან, 1200 კილომეტრიანი ოპტიკურ-ბოჭკოვანი კაბელის შესყიდვაზე... რა ეტაპზეა მოლაპარაკება?

-გიგა ბედინეიშვილი: კომერციულ საკითხებზე საჯარო კომენტარებს არ ვაკეთებ. თუ ეკონომიკურ პოლიტიკაზე გაინტერესებთ რამე, მკითხეთ.

- იმდენად, რამდენადაც ეს საკითხები უკავშირდება უსაფრთხოების თემას, გთხოვთ აგვიხსნათ, რა სახით ხართ ჩართული ამ მოლაპარაკებებში?

- თქვენს უსაფრთხოებას თუ რამე ემუქრება, მიმართეთ პოლიციას.

-აზერტელეკომთან რა კავშირი გაქვთ და როდის შეხვდით ბოლოს კავკასუს ონლაინის მფლობელს, ხვიჩა მაქაცარიას ან დირექტორს, გიორგი შანიძეს?

- არ მაქვს კავშირი.

itv.ge-მ ჩაწერა კავკასუს ონლაინის დირექტორი, გიორგი შანიძეც, რომელიც აცხადებს რომ ოპტიკურ ბოჭკოვანი კაბელის გაყიდვაზე მოლაპარაკებები არ მიმდინარეობს. თუმცა, შანიძე ვერ ხსნის იმ ფაქტს, თუ რატო საუბრობს აზერბაიჯანული და სომხური მედია ამ თემაზე, ასე აქტიურად.

„რაც ინფორმაციაც გავრცელდა უცხოურ და ქართულ მედიაში, ამასთან დაკავშირებით ჩვენ პოზიცია უკვე დავაფიქსირეთ და აღვნიშნეთ, რომ არანაირი მოლაპარაკებები ოპტიკურ ბოჭკოვანი კაბელის გაყიდვაზე, არ მიმდინარეობს“, - უთხრა კავკასუს ონლაინის დირექტორმა, itv.ge-ს.

რაც შეეხება კავკასუს ონლაინის მფლობელს, ხვიჩა მაქაცარიას, რომელმაც ჯერ მეწილეები გაუშვა კომპანიიდან და შემდეგ შეუდგა თავისი ჩანაფიქრის განხორციელებას, ის, ჩვენი ინფორმაციით, დუბაიში იმყოფება და მისი და მოქმედი ჩინოვნიკების ერთობლივი ბიზნეს-ინტერესების შესახებ საინტერესო სიახლეებს მალე შემოგთავაზებთ.