ბიზნესი

„თეგეტა მოტორსი“ გარემოს დასაცავად - კოლაბორაცია ბრენდ „ადამიანთან“

რამდენად შესაძლებელია, მოძველებული სარეკლამო ბანერები ნაგავსაყრელზე არ აღმოჩნდეს და ახალი სიცოცხლე შეიძინოს? ამ კითხვაზე პასუხი ქართული ბრენდის, „ადამიანის“ შთამბეჭდავი ნამუშევრებია, რომლებიც მოძველებული, გადამუშავებული სარეკლამო ბანერებისგან სხვადასხვა საჭირო აქსესუარად იქცა.

ბრენდი „ადამიანის“ ძირითადი საქმიანობა ადგილობრივი წარმოების ტყავის ნივთების წარმოებაა, თუმცა ცოტა ხნის წინ კომპანიამ ეკომიმართულება დაიმატა და სხვადასხვა ბიზნესს მათი სარეკლამო ბანერების გადამუშავებას სთავაზობს. „ადამიანის“ დამფუძნებელი ნიკოლოზ ლუტიძე ამბობს, რომ ამ შეთავაზებაზე პასუხად აღფრთოვანებაც მიუღია, გაკვირვებაც და ირონიაც. „თეგეტა მოტორსი“ კი ის კომპანიაა, რომელიც ბრენდთან თანამშრომლობის შეთავაზებას უყოყმანოდ დასთანხმდა. კოლაბორაციის ფარგლებში „ადამიანმა“ „თეგეტა მოტორსის“ სარეკლამო ბანერები გადაამუშავა და მეორად ნედლეულს ახალი სიცოცხლე შესძინა.

ნიკოლოზ ლუტიძე, ბრენდ „ადამიანის“ დამფუძნებელი: „ჩემი მთავარი მიზანია, რაც შეიძლება ნაკლები ნარჩენი მოხვდეს გარემოში, ნაკლებად დაბინძურდეს პლანეტა, სადაც ვცხოვრობთ. „თეგეტა მოტორსთან“ თანამშრომლობის შედეგად მივიღეთ ძალიან ლამაზი ლეპტოპის ჩანთები. „თეგეტა მოტორსი“ აღმოჩნდა ის კომპანია, რომელმაც მარტივად აღიქვა ამ პროექტის პოტენციალი და გარემოსთვის სასარგებლო დატვირთვა. სწორედ საერთო ღირებულებები და გარემოსდაცვითი ხედვა გახდა წარმატებული კოლაბორაციის საფუძველი. პროექტის ფარგლებში 8 უნიკალური დიზაინი შეიქმნა. ორივე მხარისთვის ძალიან სასიამოვნო იყო მუშაობის პროცესი, შედეგად კი, ვფიქრობ, ძალიან კარგი პროდუქტი მივიღეთ“.

„ადამიანთან“ თანამშრომლობა „თეგეტა მოტორსის“ და „თეგეტა გრინ პლანეტის“ ერთობლივი კამპანიის - „არ გადაყარო, ჩააბარე“ - ფარგლებში შედგა, რის შედეგადაც კომპანიის  მიერ გამოყენებულმა სარეკლამო ბანერებმა ახალი ფორმა, ფუნქცია და სიცოცხლე შეიძინა.

თათია ხორბალაძე, „თეგეტა ჰოლდინგის“ სტრატეგიული კომუნიკაციების დეპარტამენტის ხელმძღვანელი: „ნარჩენების პრობლემა დღეს ერთ-ერთი ყველაზე დიდი გამოწვევაა მსოფლიოში. ყოველდღიურად ნაგავსაყრელებზე ხვდება ტონობით მასალა, რაც არა მხოლოდ გარემოს აბინძურებს, არამედ ხელიდან გვაცლის იმ რესურსს, რომელსაც ახალი სიცოცხლის დაწყება შეეძლო. ჩვენი კამპანია, რომელიც ნარჩენების გადამუშავების საერთაშორისო დღეს მიეძღვნა, ამ გამოწვევას ეპასუხებოდა და სხვა აქტივობებთან ერთად „ადამიანთან“ კოლაბორაციაც სწორედ ამიტომ გადავწყვიტეთ.

„ადამიანის“ ხედვა და მისია სრულ თანხვედრაშია „თეგეტას“ კორპორაციული სოციალური პასუხისმგებლობის პრიორიტეტებთან.  ჩვენთვის უმნიშვნელოვანესია, ერთი მხრივ, გარემოზე ზრუნვა და, მეორე მხრივ, ისეთი კომპანიების მხარდაჭერა, რომლებიც თავიანთი საქმიანობით  ზრუნავენ გარემოზე. ინფორმაცია ბრენდის ეკოაქტივობების შესახებ დონაციის პლატფორმა Tegeta.care-ზეც განვათავსეთ, რათა მეტმა ადამიანმა შეძლოს ინფორმაციის მიღება და „ადამიანის“ გარემოსდაცვითი აქტივობების მხარდაჭერა“.

ბრენდი ბაზარზე 2013 წელს გამოჩნდა „ჰუმანოიდის“ სახელით და იმ დროისთვის უჩვეულო პროდუქტი - ადგილობრივი წარმოების ტყავის ჩანთები, საფულეები და ბლოკნოტები შესთავაზა მომხმარებელს. მოგვიანებით კომპანია გაიზარდა, სახელი შეიცვალა და „ადამიანი“ გახდა. კომპანიის ძირითად ხაზს ნარჩენების მართვის მიმართულება ბოლო წლებში დაემატა.

„ადამიანის“ მეორე პროექტი ქვეყანაში  მიუსაფარი ცხოველების პრობლემას ეხმიანება. „მაშო მეგობრებისთვის“ - ასე ჰქვია პროექტს, რომელიც ცხოველების საკვების დაცარიელებული ტომრების გადამუშავებას და ამ მასალით ახალი ნივთების დამზადებას გულისხმობს, მათი გაყიდვიდან მიღებული თანხის 30% კი მიუსაფარი ცხოველების მკურნალობასა და კვებას ხმარდება.

ბრენდ „ადამიანში“ იმედოვნებენ, რომ მათ მიერ წამოწყებულ გარემოს დაცვით პროექტებში სულ უფრო მეტი ადამიანი თუ კომპანია ჩაერთვება. Tegeta.care-ის მეშვეობით კი თითოეულ ჩვენგანს შეუძლია, წვლილი შეიტანოს ჯანსაღი გარემოსა და უკეთესი ეკოსისტემის შექმნაში.

--

თეგეტა მოტორსის შესახებ: თეგეტა ჰოლდინგში შემავალი კომპანია თეგეტა მოტორსი 1995 წლიდან ოპერირებს ბაზარზე მსუბუქი, სატვირთო და სპეციალური დანიშნულების სერვისის მიმართულებით. ავტოინდუსტრიის ლიდერი კომპანია მომხმარებელს ავტომომსახურების სრულ სპექტრს სთავაზობს, როგორც მსუბუქი და სატვირთო ავტომობილების, ისე ავტობუსებისა და მიკროავტობუსების, ასევე სპეციალური დანიშნულების ტექნიკის მიმართულებით. კომპანიას მთელი ქვეყნის მასშტაბით 28 ფილიალი აქვს, რომლებიც 500 000-მდე საცალო და 35 000-მდე კორპორაციულ მომხმარებელს ემსახურება. თეგეტა მოტორსი 300-მდე მსოფლიო ბრენდის წარმომადგენელია საქართველოში, მათ შორის არის Bridgestone, Michelin, Varta, Shell, Motul, Hengst და სხვა.