,,ვარ ქიმიოთერაპიის პროცესში, დარწმუნებული ვარ ამ ...
პარლამენტის ოპოზიციონერი დეპუტატი, ხათუნა სამნიძე მძიმე სენს ებრძვის. ის ახლა ქიმიოთერაპიის კურსს გადის, რაზეც ტელეკომპანია “ფორმულაზე” თავად ისაუბრა. "ქალ დეპუტატებთან ერთად ამ მძიმე ბრძო...
ქართული საგალობლები ფრანკფურტის წიგნის ბაზრობაზე
საქართველო ფრანკფურტში ქართული გალობის ორი უნიკალური კრებულით წარდგება
საქართველოს ფოლკლორის სახელმწიფო ცენტრმა, თბილისის სახელმწიფო კონსერვატორიასა და ფონდ "ქართულ გალობასთან" ერთად, ფრანკფურტის წიგნის ბაზრობისათვის სპეციალურად ქართული ტრადიციული საგალობლების ორი კრებული მოამზადა: "ქართული საგალობლების კრებული" და "შენ ხარ ვენახი". ამ უნიკალური გამოცემებით ქართული პროფესიული მუსიკა სათანადოდ წარმოჩნდება ერთ-ერთ ყველაზე პრესტიჟულ საერთაშორისო ღონისძიებაზე - ფრანკფურტის წიგნის ბაზრობაზე.
"ქართული საგალობლების კრებულში" წარმოდგენილია ქართული ქრისტიანული კულტურის წიაღში განვითარებული შუა საუკუნეების პროფესიული მუსიკის ნიმუშები – პოლიფონიური საგალობლები. მას პროფესიონალი მელოდოსი-ჰიმნოგრაფები თხზავდნენ და ძველი მუსიკალური დამწერლობით – ერთიანი ქართული ნევმური სისტემით - იწერდნენ. XIX საუკუნის ბოლოს საგალობლები ნოტებზე გადაიღეს. მხატვრული ღირებულებით, პოლიფონიური და ჰარმონიული აზროვნებით გამორჩეული ქართული საგალობლები დღეს ქართველი და უცხოელი მეცნიერების დიდ ინტერესს იწვევს. იგი სრულდება არა მარტო ღვთისმსახურებაში, არამედ სცენაზე - საქართველოში თუ მის ფარგლებს გარეთ.
"შენ ხარ ვენახი" ეძღვნება ერთ საგალობელს, ქართული გალობის სიმბოლოდ ქცეულ ღვთისმშობლის ჰიმნს, რომლის ავტორია მეფე დემეტრე პირველი - ბაგრატიონი. ეს რენესანსული სულით გამსჭვალული ქმნილება მსოფლიოს გააცნობს ქართული მუსიკალური კულტურის ერთ-ერთ უძვირფასეს მარგალიტს.
„საქართველოსთვის უდიდესი მნიშვნელობა აქვს, რომ ფრანკფურტის წიგნის ბაზრობაზე საქართველო მასპინძელი ქვეყნის სტატუსით წარსდგება. ჩვენს ქვეყანას შესაძლებლობა ეძლევა სრულად წარადგინოს თავისი კულტურული რესურსი. გამოცემების ორგანიზატორმა განათლების, მეცნიერების, კულტურისა და სპორტის სამინისტრომ, იზრუნა იმაზე, რომ სხვებთან ერთად ჩვენი წიგნებიც გასულიყო ქვეყნის გარეთ და დაბეჭდილიყო ისეთ საერთაშორისო მნიშვნელობის გამომცემლობაში, რომელიც თავად უზრუნველყოფს მათ გავრცელებას და ხელმისაწვდომობას მთელ მსოფლიოში. „ქართული საგალობლების კრებული" საქართველოს ყოველი კუთხის საგალობლის ნიმუშსა და სანოტო ჩანაწერს მოიცავს. გამოცემაში „შენ ხარ ვენახი“ წარმოდგენილია ამ საგალობლის 21 ვარიანტის სანოტო ჩანაწერი, რომელთაგან 14-ის აუდიოჩანაწერი შესულია თანდართულ აუდიოალბომში (მათ შორის „რუსთავის“, „ბასიანის“ და სხვა)“ - წლევანდელი ფესტივალის მნიშვნელობასა და გამოცემების უნიკალურობაზე საუბრობს საქართველოს ფოლკლორის სახელმწიფო ცენტრის დირექტორი გიორგი დონაძე.
ფრანკფურტის წიგნის ბაზრობას (Frankfurter Buchmesse) 500-წლიანი ისტორია აქვს. იგი ყოველი წლის ოქტომბრის შუა რიცხვებში ფრანკფურტის საგამოფენო სივრცეში ტარდება, 300 000-მდე ვიზიტორს მასპინძლობს და 400 000-მდე წიგნს გამოფენს.
კომენტარები